Vawleicung Ram Nih Trump Cu Hi Tinhin An Hmuh Cang

Pew Research Center (PRC) nih vawleicung ram 25 ah sinah research an tuahmi cu Trump president a si hnu in Vawleicung ram tampi nih White House cung zumhnak an ngeihmi a zor thluahmah tiah thawngthawnhnak an tuah.

Aruang bik hi; Donald Trump nih ram dang pawl le vawleicung pehtlaihnak hi biapi ah a chiah lo caah a si bik tiah an zumh. President Trump nih 2016 Election ah a rak dirpimi cu ‘ America First’ a si. America a himnak ding ‘national security’ caah ai timhtuahnak strategy phun 4 cu President Trump nih a phuan bal cang. President Trump ai timhtuahnak a muru ngan bik cu ‘Pakhatnak ah America’ timi ‘America First’ hi a si.Sipuazi le vawleicung power ngeihnak ah China le Russia hi zuamcawhtu ngan bik an si tiah a chim lengmang. Atu ni tiang ah China he chawletthahnak kong ah an buai peng. America ram him tein chiah ding(Protecting The Homeland)

America ram him tein chiah khawhnak ding caah ramri him tein kan chiah a herh, ramri him tein kan chiah khawh lo ahcun kan ram chung a him kho ve lai lo. Biatak tein America ram ven a hau cang.

America rum ter ding(Promoting America Prosperity)

Ram pakhat a himnak ding caah sipuazi lei in a thazaang a thawn hmasa hrimhrim a herh, sipuazi thazaang a thawn lo ahcun ram pakhat a thazaang a thawng kho lo i rampi himnak zong a hnursuan kho. Rampi a himnak lawng si loin vawleicung level ah America thazaang a thawn chin nak ding caah sipuazi lei kan thazaang a thawn hmasa a herh.

Thazaang thawn nak in daihnak ser ding(Peace Through Strength)

Ralkap thazaang kan ngei lo ahcun khawika hmanh ah daihnak kan ser kho lai lo, daihnak ser nak ding caah ralkap lei kan thazaang a thawn hmasa a herh. Kan hawikom he kan tangti lai i North Korea nuclear kan chiahter lai.

Internet himnak(Cyber Security)

America ram hi internet chung zong ah him tein kan chiah a herh, internet chung in IS ralhrang pawl America ram chung an luh khawh lo ding caah tuanvo kan lak lai. Hi phunli hi biatak tein tlamtinter khawh aa zuam. Mexico nih Trump cungah zumhnak an rak ngeimi 34% cu a zor tiah PRC nih an hmuh. Canada zong nih USA cung i zumhnak an ngeihmi cu 26% a ttum.

Asia ah cun Philippines pawl nih Trump hi an rak uarbik nain 92% in 83% ah an zumhnak a zor cang. Donald Trump president a si hn in South Korea (80%), Japan (67%) le Australia (54%). PRC nih an hmuh. European ram 10 nih cun (43% nih an uar 52% nih cun an uar lo).

USA hawi ttha a simi ram UK, Canada, Germany, France pawl nih cun Trump nih a kalpimi policy hi thinphan dai lo a si tiah an ruah.

Donald Trump a zumbik ram cu Israel an si. Jerusalem ah American Embassy a tthial hnu in 56% in 69% ah Trump an zumhnak a kai. Vawleicung ah Trump nakin Germany chancellor Angela Merkel le France president Emmanuel Macron cung ah zumhnak le ruahchannak an ngei deuh can.

Ref: pewglobal