Tuzan Ca Ah Pathian Bia: Fahsak Lo Tein Ka Palh, Ka Sual Ti Hi Zumtu Tha Sinak A Langhnak A Si

Fahsak Lo Tein Ka Palh, Ka Sual Ti Hi Zumtu Tha Sinak A Langhnak A Si

“Cun David nih Nathan sinah cun, ‘Bawipa sinah ka sual cang,’ tiah a ti. Cun Nathan nih David cu, ‘Bawipa zong nih na sualnak kha an ngaihthiam cang, na thi lai lo…,’ tiah a ti.” (2 Samuel 12:13-14)

David nih Pathian thimmi siangpahrang, Pathian lung a tongmi siangpahrang a si ti hi Baibal nih a kan cawnpiakmi a si. David nih siangpahrang a tuan chungah voi tampi sualnak a tuah, sualnak a tuahmi hi sualnak ngan pipi an si.

Uriah a thah i a nupi Bethseba zong a chuh. Cu ruangah cun Nathan profet nih David cu a rak fuh. Nathan nih David sualnak kha a phuan i a cung i dantatnak a tlung dingmi a chim tikah David nih a sualnak cu tha tein a cohlanh. David nih, “Bawipa sinah ka sual cang” tiah a ti. Saul Siangpahrang nih cu Pathian hmai ah ka palh, ka sual tiah a ti duh lo. Judah siangpahrang tampi nih Pathian hmai ah ka sual cang ti chim hi an i harh tukmi a si.

David nih sualnak a tuah fatinte Pathian hmai toidor tein a um i a sualnak ai ngaichih. Pathian sinah a sualnak ca ah raithawinak a pek. Cu ruangah Pathian nih David hi Judah siangpahrang vialte lakah cungnung bik ah a chiah. Israel ram kha chaklei pennak le thlanglei pennak tiah an i then hnu ah Israelmi nih an ngaih tawnmi pennak cu David siangpahrang pennak hi a si.

Toidornak taktak a ngei lomi hruaitu hna nih cun Pathian hmai ah ka palh ko tiah an ti kho lo, an hruaimi hna sin zongah ka palh ko tiah an ti kho lo. Ka ngaithiam tiah chim hi an i faksak tawn. An chim a si hmanh zongah an i ngaichih than, mi nih a kan tei tiah an ruah.

A si lo, lung tak tein midang ngaihthiam a hal khotu cu mi teitu a si. Nu le pa nih fale sinah ka palh ti kan i harh tuk, ka palh ti chim duh loin kan nawlngeihnak in uk kan timh hna. Upa deuh nih ngakchia deuh sinah ka palh ti cu kan duh lo. Ka palh ti chim hi kan i faksak bikmi thil pakhat a si. Hihi cu taksa sinak lawng a si, thlarau nunnak caah cun thanchonak dawntu nganbik a si. David siangpahrang nih cun ai fahsak lo, fawi tein ka palh, ka sual tiah a chim khawh peng.

Hi lungthin nih hin David zumhnak le toidornak lungthin fiang tein a langhter. Ka palh, ka sual tiah an chimter lotu cu uanthlarnak, phorhlawtnak, mah le mah sang tuk ah i chiahnak lungthin a si.

By : Saya Than Kep