“Ralchiat Le Toidor” Zong Thleiden A Har Cang!

“Ralchiat Le Toidor” Zong Thleiden A Har Cang!

Zing fatin vawlei cung thawng ka kau poh ah, “thawngpang” ka hmuh ti lonak caan a sau pah cang. Khat le khat teirul i chamnak le i lehrulhnak hi tam bik ka hmuhmi an si! A cheu cu tuahsernak in an i lehrul hna i a cheu cu bia le holh in an i lehrul ve hna.

A ngan cem ah, US cozah nih kan ram mithimnak ah naa hrolh peih tiah Russia dan an tat i Russia nih a ram chung US cozah riantuan minung 1000 tluk dawinak in a leh rulh colh. North Korea cu neuclear bomb a test caah UN nih dan an tat i daih lei loin tam chinchin a test. Nai US meeting ah US president Trump nih North Korea a zia a thinh lo ahcun “a ci kan hmih lai” tiah a chim i North Korea hruaitu Kim te phuih nih “hi bantuk uico hrang kahnak ahhin pei nuclear cu kan ser cu” tiah an lehrulh ve hna.

Kanmah Kawlram ah, Ralkap nih an kan hrem tuk kan celh ti lo an ti zau i Rohingya phu nih cozah palik/ralkap sakhan an kah hna i an zia tthinh nemmam Kawl ralkap nih cei chinchin in an thuat diam ko hna. Cu ruang ahcun, British cozah nih Kawl ralkap traning kan pek tawnmi kan phih chung rih lai tiah an ti nain Kawl ralkap nih phih chung lawng si hlah seh zeitik hmanh kan kal bal ti lai lo tiah an leh colh hna.

Hi vialte hi vawlei uktu leikap an si caah tiva ral thil ah hei chia ko rih u sih. Nai hrawng ah, Trinity pawl le Oneness pawl karlak ah biaelnak vialte kan theih dih cio. Na ngamh maw, na ngamh chin maw? timi dirhmun khi kan si ve. Pathian bia aa elmi cheukhat bia chimning catialning ka zoh tik ah hmaitonh cun kuttum zuang dimg kan tlawm lo. Hi hi bantuk thil lawngte hi nifa tin kan relmi le kan theih pengmi an si caah, atu cu ka lung aa tuai ve cang! “Ralchiat le Toidor” ka thencheu kho ti lo i “Ralthat le Hruh” zong ka cawh dih cang ai.

Nang na si ve maw? Duh lo ning deuh hun ti sual ahcun mi bia leh aa fawih ngai ding phun in ka lungthin um ai tim mi a lo ve cang! Cu zong cu micheu ka chimh hna tik ah, “aaa poi lo, chantiluan nih a ngeih” an ka ti men ko. Asi ahcun “midang bia leh, bia el, le teirual cham” vialte hi chantiluan nih maw a chuahpi ne? Tu chan hna i mi biafak i in sawh cu chantiluan dawi khawh lo bia an timi hi tah zeitindah nan ruah cio?

Voikhat cu Jesuh nih Lamkaltu pawl ngaihthiam le teidor nun a cawnpiak hna. “Zeibantuk in an in ti hna zong ah nan let hna lai lo. Ni khat ah voi 7 an in sual hna zong ah nan let hna lai lo? (Luke.17:4) tiah a ti hna. Minung fa tuah khawh ding ah an rel lo caah an lung a rawk ” Bawipa cu bantuk cu kan zumhnak nih a phanh phun si lo; kan zumhnak hi karhter kun” V.5 tiah an ti.

Sihmanhsehlaw Jesuh nih mi ngaihthiam khawhnak caah nan zumhnak karhter a hau hrimhrim lo “Nan zumhnak cu an tam ci tiat hmanh va sisehlaw nan i nunpi le nan hman taktak ahcun zei poh nan tuah khawh dih ko lai V.6 tiah a ti hna. Jesuh Khrih zumhnak kan ngeih taktak ko ahcun a tlawm le tam, a hme le ngan um lo.

A zummi poh nih teidornak le ngaihthiam nun ngaih dih khawh a si. Hman le hman lo lawng a si ko! Kan zumhnak hmang hna u sih. Cucu social media nih a chuahpi mi ziaza tha lo teinak lam um chun a si.

Credit: Pastor Hram Bik Lian