Minung Nih Si Loin Baibal Nih Holhtheihlo/ Holhdang Dang A Hmuh Ning

“Holh” cu zeidah asi? Greek biafang “Glossa”, cu tongues tiah leh asi i a sullam cu vawlei thilri asi mi holh tinak a si lo. Holh(Language) tinak a si i a sullam cu “na hngalh thiamnak nih a hngalh khawh lomi khi a si.”

A ngai ngai tiah cun kan Baibal ca nih holhdang dang (other tongues) kong phunli in a kan cawnpiak. Kan vawlei pi ah Holh phunli lawnglawng a um tinak asi lo i, a bik in 1 Korin le Lamkaltu ah kan hmuh mi holhdang dang Kong tu khi asi. Biakamthar nih holhtheihlo/ holhdang dang kong phunli in a chim mi cu:

  1. Holhdang dang hna hi zumlotu hna caah hmelchunhnak
  2. Holhdang dang cu a sullam leh ding
  3. Holhdang dang cu Thlarau nawlpiaknak/ thlacampiaknak
  4. Holhdang dang cu ziaza tthatternak chuahtertu Thil pumpak thlacamnak caah

Pathian bia ah holhdang dang phunli hna cu phunhnih ah fiang tein a kan cawnpiak.

– A pakhatnak cu Zapi he a pehtlaimi riantuannak(Public Ministry),

– A pahnihnak cu Pumpak he a pehtlaimi riantuannak (Private Ministry) a si.

– Zapi He a Pehtlaimi Riantuannak hna cu:

Holhdang dang hna hi zumlotu hna caah hmelchunhnak asi.

Holhdang dang hna hi zumtu hna caah hmelchunhnak (Sign) si loin zumlotu hna caah asi deuh (1 Korin ‪14:22a). Hihi Zumlotu asimi hna Lamkaltu dal 2 i Jerusalem ah Pentecost niah holhdang dang phun 16 kha leh hau bak loin an chuahkehnak ram/an mah le holh cio in an theih kha asi. Holhdang dang hna hi zumlotu hna caah hmelchunhnak ah a hun um hi Thiang Thlarau nih lungchung in hngalh khawhnak thazang, a hlan ah an ton bal lomi vawlei holh phundang dang in chim, phungchim, asiloah cawnpiak nawl peknak a si. Hihi Thiang Thlarau nih a duh caan lawnglawng ah a hung cang mi asi. Holhdang dang hna cu a sullam leh ding asi.

1 Korin 14:5 “Nan dihlakin holh phun kip in nan holh ah kan duhpiak hna, asinain, cu nak hmanh in phung nan chim khawhnak hi kan duhpiak chinchin hna.

Hihi Thlarau laksawng pakua chung ah pakhat aa tel ve mi asi i zapi i pumhnak ah a cangmi le Thlarau nih mi pakhatkhat cung ah a phanh i vawlei holh asi lomi Van holh in holh a ni thok. Van holh ka ti tikah na khuaruah har hlah seh.

Kan chim mi na fiandeuhnak caah asi. Cu Van holh cu Mithiang Paul nih leh hrimhrim awk a timi cu 1 Korin 12:28-30 ah fiang tein a chim. Hi holh hi a um ciami holh leh/ caleh (Translate) si lo in a um ballomi holh a sullam leh (interpret) kha asi.

 

– A pahnihnak cu Pumpak he a pehtlaimi riantuannak

  1. Holhdang dang cu Thlarau Nawlpiaknak/ Thlacampiaknak asi (Leh a hau lo)

Rom 8:26-27, “Cu bantuk cun Thlarau nih kan derthawmnak ah a kan bawmh; zeitindah thla kan cam lai ti hmanh kan hngalh lo lioah cu Thlarau nih cun chim khawh lomi aihramnak in a kan nawlpiak. Minung lungthin a hngal dihtu Pathian nih cun Thlarau lungput cu a hngalh; zeicahtiah Pathian duhning in Thlarau nih cun mithiang mi hna caah a halpiak hna.”

Hi holh phun cu holhdang dang pinah a cangmi le Thlarau nih hmurka in chim khawh lomi aihramnak he thla a kan campiak hi asi. Thlarau nih zumtu nunah Thla a kan campiaknak/ nawlpiaknak hi tuchan Khrihfabu tampi ah cun a tlau cang. Hi nawlpiaknak phun cu khuaruah harnak in a khatmi Thlarau nawlpiaknak (intercession of Spirit) minung sinak nih hngalhkhawh lomi le zumh har taktak mi Baibal cawnpiak nak asi.

  1. Holhdang dang cu ziaza tthatternak chuahtertu Thil pumpak thlacamnak caah asi. (Leh a hau lo)

1 Korin 14:4, “Cucaah holh phun dang in a chimmi nih cun amah le amah aa sersiam(edify), asinain phung a chimtu nih cun Khrihfabu a sersiam(edify).”

1 Korin ‪14:14-15, “Zeitintiah holh phun dang in thla ka cam tikah ka thlarau nih a cam nain ka lungthin cu a cawlcang lo. Zeitindah ka tuah kun hnga? Thlarau cun thla cu ka cam lai i ka lungthin zongin ka cam lai; thlarau in hla ka sak lai i ka lungthin zongin ka sak lai.”

1 Korin 14:2, “Holh phun dang in bia a chimmi cu minung sinah chim loin Pathian sin tu ah a chim, sihmanhsehlaw ahohmanh nih an hngalhpiak lo, zeitintiah Thlarau in biathup a chim caah a si.”

Judas 20, “Sihmanhsehlaw, ka dawtle hna, nannih tu cu a thiangmi nan zumhnak ah khan i chap chinchin u law Thiang Thlarau hruainak in thlacam u.”

Mirang biafang “edify” cu “edifus” i a hram in lak mi, a sullam cu “a dawh ngaingai mi a nganpi inn sak” tinak asi. Cu bantukin holhdang dang in thla na cam caan ah na nunnak ah Thil dang pakhat sakmi, Pathian lei Thil asimi riantuannak na chungah Bunh/ dirter i Pathian thawnnak le umnak inn aa thawk asi.

1 Korin 14:5, “Nan dihlakin holh phun kip in nan holh ah ka duh, asinain, cu nak hmanh in phung nan chim ka duh deuh. Khrihfabu a sersiam khawh nakhnga caah pakhat nih an lehpiak tung lo ahcun holh phun kip in a holhmi nakin phung a chimmi cu a ngan deuh.”

1 Korin 12:1, “U le nau hna, Thlarau laksawng kong ah theihter lo nan si cu ka duh lo.”

1 Korin 14:38-39, “Hihi a theihngal lomi cu amah zong theihhngalh a si ve lo. Cucaah u le nau hna, phungchim cu lungtak tein duh u, cun holh phun kip in holh kha thlauh hlah u.”

NOTE:

  1. Holhdang dang cu Zapi he a pehtlaimi riantuannak asi mi minung (Biakamthar ah) hna caah hmelchunhnak Thawngthabia chimnak ah le a um ballomi holh leh hrimhrim awk ah hman asi.
  2. Holhdang dang cu Pumpak he a pehtlaimi riantuannak asi mi Thlarau nawlpiaknak le pumpak nun ziaza tthatternak chuahtertu thil pumpak thlacamnak ah hman asi.
  3. Holhdang dang (other tongues-plural) in Lamkaltu ah a hman i 1 Korin ah cun Holh (tongue-singular) ah a hman. Lamkaltu dal 2 Pentecost Ni ah Jerusalem ah a cang mi kha holhdang dang phun 16 kha an chuahkehnak holh/ an mah le an holh in Thlarau bawmhnak thawng in an hngalh. Cucu Leh a hau lo. Asinain 1 Korin ah a chim mi holh(tongue) cu leh hrimhrim awk ati caah vawlei holh asi lo mi holh, Thiang Thlarau bawmhnak lawnglawng in hngalh khawh mi a um. Holh phunkhat a hmangmi Korin Khrihfabu caah zeiruangahdah Holh leh cu a herh? Cucu Holhtheihlo cu asi hnga lo maw?
  4. Holhdang dang in bia a chimmi cu minung sinah chim loin, Pathian sin tu ah a chim asi.
  5. Holhdang dang cu Khamhnak hmelchunhnak caah a herh lo.
  6. Holhdang dang kong zumhnak/ zumhlonak nih kan khamhnak a dawn khan lo. Jesuh Khrih tu ah buai hram i thok u sih.
  7. Holhdang dang a holhmi kha thloh lo ding.
  8. Holhtheihlo cu Baibal a Tling cang caah a um ti lo kan ti pah in, Baibal ah Holhtheihlo cu a um lo holhdang dang lawng a um kan ti pah. Kanmah zong ka ni fiang ti lo.
  9. Holhtheihlo a um lo ah cun zeiruangahdah kan buaipi, a um lomi cu buaipi phung asi lo. A um a timi nih buai pi ko u sih.
  10. Kan zumh lo ah cun kan Khrihfabu ah khan cawnpiak ko hna u sih. Kan Khrihfabu ah mah kong an cawnpiak hna ah cun kham ko hna. Midang soiselnak ah hmang hlah u sih. Khrihfa hmasa hna nih an rak i al/ ceih tti cang mi a dong kho lo mi kong alnak asi caah kan zumh ning te tu khan Khrihfabu cu hruai u sih law, mah nak in a biapi deuh mi dawtnak kha langhter u sih. Dawtnak kan langhter khawh tung lo ahcun mi buaitertu cu si hram hlah u sih.
  11. An dihlak in lamkaltu an si maw? Profet an si dih maw? Cawnpiaktu an si dih maw? Khuaruahhar sertu an si dih maw? AN SI DIH LO!

Damternak laksawng an ngei dih maw? NGEI DIH LO!

Holh phun kip in an holh dih maw? HOLH DIH HLAH EE! A sullam an let kho dih maw? LET KHO DIH HLAH!

  1. Pathian nawl a theihngal lomi cu amah zong theihhngalh a si ve lo.

Thiang Thlarau nih na relmi ah fiannak in pe seh!

By : Dawt Tha Cem