Malaysia Um Chin Ralzam Nih Hngalh Bak Ding

Malaysia ummi Chin ralzam pawl cu nan ram a him cang caah 2019 December 31 tiang lawng kan zohkhen cang hna lai tiah UNHCR nih a phuang cang.Cu ahcun 2018 – 2019 December karah Chin ralzam chungah 5200 cu ram thumnak kan kalter hna lai a ti.Atu Malaysia UNHCR Kad taktak aa tlaihmi hi 10000 hrawng an si hnga maw! Cu lakah 5200 kan zuh ahcun 5000 hrawng an tang lai.

Malaysia ah a ummi Chin minung hi 350000 hrawnghrang ti ko u sih. Cu 35000 ah a kal ding pawl 5200, le Kad ngeitu 5000 hrawng dihlak 12000. Zeihmanh ngei lomi 2013 pawl le community kad paw 23000 hrawng kan si lai.

Atu tlaihkhih atongmi hi 23000 chungah aa telmi pawl an si. Hi minung tamdeuh 23000 caah pakhat hmanh tel loin Himte le duh tawkin a um khawhmi UN Kad tlaihtu 5000 pawl caah cun maw, Kawlramlei Chin Upa, USA lei Upa hna auh in, Chin Fellowship upa vialte kan boipi lengmang ko lai!

Cun hi a tangmi 5000 pawl hi ram 3nak kalter ti le disqualified case an si caah auh lonak an simi hngalh cia a si fawn. 2019 December 31 hlan-ah a tlung kho lomi caah 2020 tiang um khawhnak lam tehna upa pawl nih an hmuh khawh maw! Kalnak lei cu chim a har deuh i, kan um chung himnak lam an kan hmuhpiak kho hnga maw, timi te lawng ruahchannaka um. Cu lam cu an kawl maw kawl lo ti cu kan zoh te lai!

Cun tlung tikah Limhang ngei buin tlung ding timi a duhmi nan um ahcun mitha na si zong, mithalo nan si zongah Kawl ralkap hmaiah mah tein vaa hngalhternak a si. UNHCR hmuh cangmi minung cu Kawl ralkap thangchiat a chimmi ti cu Kawl ralkap zong a hngalh tukmi a si. UNHCR zung ah nan thatlonak ka chim nain lam a pit cang caah atu hi nanmah sin kan rak panh than ko tinak a si.

2008 Costitution remh hlan-lo chung cu ralkap nih Kawlram a uk, NLD cu thanhchonak ca lawng nawl a ngei rih. Chunglei nawlngeinak cu ralkap a si rih timi lungfim a hau.Kannih caah UNHCR riantuan a dih lai timi hi atu lawng chimmi bia a si lo, 2013 in keimah ka chim cang. 2015 NLD a kai bakin ka chim rih. Tukum UNHCR a chim hnu lawngah kan lau.

.Community Kad aa tlaihmi zong nih kan ram cu a chia tuk., ka tlung duh hrimhrim lo kan ti. UN minung si loin khoika na kal lai? UN minung caah lam kawl khawh ahcun kalnak lam zong an ngei lai, Community Kad ngeimi nih kan ram a tha lo ti lengmang ding a si lo, Malaysia ah tangka kawl a thadeuh caah him tein riantuan khawhnak lam tehna a um hnga maw ti ahcun phundang a si.

UN Ofisa si zong, kan ram lei upa pawl zong nih kan ram a tha ko cang, rak tlung ko u an timi hi kanmah umtuning zoh in bia an chimmi a si. Aho hlei va mawchiat ding a si lo.Cun Chinram ah Ralzam Inn tiin Inn nganpi sak hna sehlaw, Malaysia ah UNHCR Kad aa tlaih cangmi unau! Cu Ralzam Innpi ahcun um ve dingah na sawk taktak lai maw?Na sawk bal lai lo, a ruang cu nangmah nih na hngalh deuh ko kha!

A tlungmi paoh duh tawkin kan tlung, Airport ah foto tiang a thlahmi tampi an hmuh cang. Cun a tlung ciami cungah nihin tiang ralkap nih zei hmanh a ti lo. An duh ningin um khawh a si. Kanmah lei in kan ram a tha lo kan ti zongah a chung ummi mipi nih thil sining an hngalh deuh.

Kawlram cozah nih Inn le rian zong kan pek khawh sehlaw a tha tuk hnga a timi kan um pah hoi. A ram chhungah fel tein a um komi hmanh rian tha a pek khawh lo lawng a si lo, kokkek ruangah thih le lo a tongmi mipi hmanh a zohkhen cawk lomi ramdang chuak i, anmah thangchiat a chimmi minung caah Inn le lo pek ding cu! Kan thluak hi fak deuh in tat a hau ko.Daw Su nihcun tampi khua a ruat ko lai nain amah nawl in a kal khawh dih rih lo timi hngalh a herh ve.

Cun ralzam a si lomi Community Kad aa tlaimi tampi nih kir duh lo ruangah ralzam ka si ko tiah kan au lengmang. Kalnak um tung lo, kan tlung lai i, kan khua kan ram ah midang nih kan fale kha ralzam fale an rak ti ni a um te lai. Aw! ralzam kan si kan ti kho taktak lai maw? Ralzam ka ti hlah tiah a boi ding hmanh kan um te lai.

Kan ram kan phan hnucun tuan le tlai si ko, kan tong te hrimhrim ding a si. Thil singng hi thatein zoh in biachim le cawlhcang ah a tha. Hmailei kan phan dingmi dirhmun zong ruahchung lo tha a si lo. Kan tongmi paoh hi Pathian khuakhannak a si ti ding a si ko.

  1. Laiki

Credit:Iang Ngei Lairam