Hi Bantuk Ti Ruangah Kawlram A Thimi Zat Thanhnak An Tuah

Tithiang an ngeih lo caah Kum Fatin te kum 5 tang ngakchia thong 3 renglo an thi.Myanmar ram chungah a thiang lomi ti, zun/ Ek inn tlamtling in a um lo, ngandamnak a tha lomi Mitla system in pehtlaih in chawnhmi zawtnak ruangah kum fa tin te kum 5 tang ngakchia thong 3 renglo an thi tiah Britain ah a ummi WaterAid phu nih nizan an chauhmi report ca ah an tial.

Ram chungah minung 10 million hrawng hna cu tithiang hlim an hman khawh lo, minung 11 million hna tu zun/ek inn an ngei hna lo caah an duh ning paoh in pawngkal a si tiah aa tial i cucu minung 5 chungah 1 cu tithiang an ding lo i zun/ek inn an ngei loh tiah an tial chih.

Khuapi tu ahcun minung 5 chungah 4 hna nih tithiang an ding kho i minung 4 chungah 3 hna nih zun/ek inn an hmang kho ko nain mitampi an umnak khuate pawl hna tu ahcun tithiang din/hmannak le zun/ek inn hmannak cu a dang Asia ram pawl he tahchunh tikah a chia cem le a niam cem an si tiah ca an pek.

Mipi hna nih a tu bantuk in a biapimi thil an hmuh khawh lonak cu can sau pi a nguh dingmi inn le source pawl a um lo caah a si ti zong ah an chim chih. Tithiang le a thami zun/ek inn sak khawhnak ding ah investment tuah in Myanmar cozah cu kan bawmh lai tiah WaterAid phu internet website cungah kan hmuh.