Chungkhar Dawtnak Vol 1

Chungkhar dawtnak kong hi vun tial ta ka duh.Chungkhar ah dawtnak a len zungzal khawhnak hnga,zei bantuk dah Nu le Pa nih lungput kan herh ?.Cun zeitin dah Fa le cawnpiak a herh ti hi vun I hrawm hna usih ti ka duh.

  1. Nu le Pa nih zeitin dah chungkhar kan zohkhenh lai ?.

Chungkhar dirh cang hnu ahcun,zeitin dah kan fa le kan zohkhenh hna lai ti le zeitin dah chungkhar kan I zohkhenh lai,ti hi ruah lo awk a tha hrim lo.Chungkhar tha tein kan zohkhenh le kan hruai ko ahcun,chungkhar a ngan a dam i chungkhar a nuam zungzal.

Nu le Pa nih fa le hmai ah tuah awk:

Chungkhar hruainak ah a biapi bik cu,Hringtu Nu le Pa hi an si,zeitik hmanh ah fa le hmai ah ‘isik’lo ding,fa le hmai zongah bia tha lo chim lo ding.Laimi nih kan chanbau ngaimi cu mah hi a si.Fa le hmai ah ‘aw hrang’tak tak in isik le icak kan hmanmi hi,chungkhar nun I rem ding vialte lak ah,remh ding thil a tha cemmi pakhat a si.Mirang pawl hi minung tam deuh cu,fa le hmai ah zeitik hmanh ah an isik le bia hrang in an i chawn hna lo.

Zeitluk an thinhun lio le an isik lio I,an fa le an rak tin ahcun,mit hmai panh tein,an umter than i,an fa le an chawnbiak hna,mah cu thinlung put nih dawh fa le a thancho ter tuk hna cu.Nain a cheu minung cu Laimi bantuk in aisi mi an um ve ko.Fa le hmai ah biatha lo le biadawh lo kan chimmi nih an thinlung a hrawhtuk,ti hi vun philh hrim hna hlah usih.

Nu le Va cu,isik phung a si ko,(lei le dang)hmanh pei a seh an ti cu.Acaan ahcun chungkhar thancho duh ruang le chungkhar rualremnak ding ahcun isik pah phung a si ko.Nain kan isik tik bel ah fa le hmai ah isik cu hrial bak ding.

Nan isik lio ah nan fa le an rak lawi maw an rak chuah sual ahcun,sik kha (Stop) mak bak ko uh,nan fa le kha hmai panh tein chawnhbiak zuam hna usih.Nan mitthli a tla zongah,hnu lei vun i mer ta law na mitthli vun i hnawt law,tha tein chawnbiak khawh i zuam hna.Fa le nih nu le pa nan isik le nan mitthli he nan um lio hna an i hmuh hna ahcun,fa le thinlung tamtuk nan hrawkter hna.

Fa le an chuah hnu le an kal dih hnu in nan duh si le vun isik ta than ko uh.Mirang chungkhar nun ah i cawn awk ka duh ngaimi pakhat cu,Nu le Va an Isik lio i fa le chim lo,hawi leng hna maw an rat sual ahcun,nu nih zeitluk a mitthli tlak lio zongah,an thinhun a vun thumh ta i,a mittli a vun i hnawh ta i,hawi leng aw nem tein a vun chawnh khawh thanmi ka hmuh tawn hna ah ,ka thinlung nih a celh bak lo,i cawn awk ziaza vialte lak ah i cawn awk tha bik mi thil a si rua ka ti,nu lawng si lo,pa zong an si ko.

Kan nih Laimi cheu khat cu hawi leeng hmai zongah,kan Isik,kan i cak len chih ko,mah hi kan irem hrimhrim ding thil pakhat a si.Mah na rel hnu cun nang zong vun irem law nan chungkhar cu dawtnak le nuamnak in a khat zungzal lai.

Hawi leng ngeih lio isik hna kha,dawh le fim ah ruat hrim ti hlah uh,nan hawi le nih inn an va tin bak in,nan konglam vialte misin ah an chim khah,chungkhar nun kan irem a hau cang,nangmah na remh hlan ah na va or na nupi remh hmasa hlah,nangmah kha ahmasa bik ah remh hmasa i zuam law,an mah tein nangmah nun kha an i cawn ve ko lai I hnu deuh ah an i rem ve ko lai,nangmah kha hmasabik ah remh khawh i zuam.

Nu le Pa Chungkhar ah kan rian:

Chungkhar ah hringtu nu le pa hi kan biapi tuk tihi theih zungzal ding.Nunzia dawh le fa le hmai ah idaw te in um zungzal ding.Nungak tlanval lio idawt bantuk in fa ngeih hnu zongah i dawt ding,fa le mithmai ah ka nu le pa hi an i dawt tuk,duh an nung tuk ti awk tlak in um i zuam a biapituk.

Nu le pa kan nunzia a that lo ahcun,fa le cu cawnpiak khawh an si ti lo,nu nih “Khaini le ,Raza’Or a dang dang’Cun Pa nih,Zuu maw,kuak maw,tibantuk hna an tongh tham ahcun, nu le pa tuahmi kha fa le nih an zul ko hna ti hi a si.Mifim tampi hna nih an kherh tlai tik ah a hman rua tiah an ruahmi a si.

Fa le tha hna seh ti kan duh bantuk in,fa le zong nih nu le pa hi tha ve hna sehti hi an duh zungzal ve.Acheu khat chungkhar cu,nu le pa that ngai i fa le sual tak mi chungkhar kan tam ngai.Cun Acheu khat chungkhar cu fa le that ngai i nu le pa or pa maw nu hna dek sual tuk hoi ve,tibantuk hi kan tam ngai hna.Cu hna nih a chuahpimi cu,ningzah nak a chuahpi zungzal.Pa le hna zu an din tuk ahcun,fa le nih hawi hmai khah a si lo,nu le hna biachim holh rel an i sum lo ahcun fa le nih zahpi a si fawn.

Cun Fa le hna sual tuk ve ahcun Nu le Pa nih hawi hmai khah zong si ve lo,ningzah pin ah,hawi dang bantuk in fa le ruangah biachim holh rel an ngam si ti lo,hawi hmai ah an chuak ngam lang tuk lo.Hi hna hi kan ton cio mi thil an si tik ah,zeitin dah kan fa le hi kan cawnpiak hna lai,chungkhar zeitin dah nuam tein kan um lai ti hi ruah lo awk a tha lo.Fa le tha tein kan cawnpiak khawh hna a si ahcun,nu le pa upat an pek I hawi sin ah mithmai hngalter tu zong an si.

Fa le cawnpiak nak ahcun,a tha cemmi thil hna cu,ahmasa bik ah Pathian tihzah bu tein fa le cawnpiak,cun apahnihnak ah nu le pa hrim kha nun dawh tein nun i zuam,nun dawh tein kan nun ahcun kan fa le nih nu le pa nun cu zakhat ah sawmkua kua cu an i cawn ti a si.Fa le cawnpiaknak ahcun nu le pa nunzia dawh hi a rak biapi tuk.

Zu ritbu le khaini hmawm pah hna in fa le cawnpiak ahcun,fa le thinlung ah cawnpiak mi thil pawl an i cinken kho lo ti a si.Nu le Pa nih lungfim tein voikhat na cawnpiak mi khi,an thinlung ah a lut colh i,cawnpiakmi bia an ngei i,zulh an i zuam colh.tiah,Christianfamily cauk ah ka rel bal.

Nu le pa nih fa le hi fimthiamnak sang kai ve hna seh,hawi theih theih ve hna seh,hawi tluk si ve hna seh,ti hi kan saduh thah cio mi thil an si.Cu vialte a tlin khawhnak dingah nu le pa nih biatak tein,fa le kan zohkhenh hna a hau.Mah cu zeitin dah kan zohkhenh hna lai,ti hi kan vun zoh hna lai,atanglei hi ka hmuhtonmi chung in le tuah awk ah a tlak ko tiah ka ruahmi ,

  1. Pathian tihzah bu in,Fa le cawnpiak zungzal.Nifa an tuahmi thil kip kha theih khawh I zuam ding.
  2. Chungkhar thlacamnak tuah pi lengmang ding,hmailei an nun ah an i nunpi khawhnak hnga.Nunzia dawh zong cawnpiak lengmang hna ding.

3.Thilsual dah an tuah lo ahcun,a herh hua ha lo ah,sik bak hna lo ding,aw nem tein cawnpiak zungzal hna ding.

4.Chungkhar pumhnak ah thlacamter hna ding le Baibal theihhlei hal le chimter pah ve lengmang ding.

5.Zarhpi fa te (Pathian ni) poah ah,pumhnak ah kalpi hna ding.Hngachia an si ahcun Sunday School kaiter hna ding,a herh ahcun nu le pa zong nih kaipi telpi hna ding.

Author : Moses Lian Peng

Ref: Nunnak Tiva