Kuh Le Tahnak In An Caan An Hmang Kanu Kapalh Tuk Ka Ngaithiam A Ti

Fanu tlau kong hi phung an chimnak ah an chim tawn lengmangmi a si i, zeitluk in dah Pathian nih a kan dawt tiah tahchunnak ah an chim theo lengmangmi zong a si. Voikhat cu California i khua pakhat ah chungkhar pakhat an um. Pathian a duh ngaimi chungkhar zong an si.Fanu le fapa an ngei hna i sianginn sangsang an kai lio cio hna a si. An lakah nu pakhat a um i, vanchiat ah hawi thalo sinah a tla sual ve.

Nightclub kal a hmang; zudin a hmang i taksa in nun hram aa thok chin lengmang cang. A nu le pa nih nem tein an cawnpiak lengmang.Cawnpiaknak a ngai hlei lo. Caan a kal deuhdeuh i a nunnak a rawk chin lengmang. Ni khat cu a nu nih fak ngaiin a sik. An bia a linsa chin lengmang. A donghnak ahcun an nu-fa cun fak tuk in an i si i a fanu cu thinhung i lengah a chuak. A thinhun lung le a sual phuhrun ruangah a chuakmi a si i a rak tin than te ko lai tiah an ruah.Zan a tlai chin lengmang. A tin ti lo.

Khua a deu a tin hlei ti lo. Ni khat a liam a tin ti lo. Ni le caan le zarh a liam chin lengmang cang. Chungkhar lungre a thei i, an fanu umnak an thei ti lo. A sual le a palh ko bu zong ah an fanu le an unau a si cang ahcun an siang lo. Khawika ah dah a um hnga tiah an kawl i an hlat.Fapa tlau pa bang misin ah a rak lut i nan rian ka tuan ko lai. Ka umter ko u tiah a rak nawl hna i an rak umter. A um kaa ahcun a fel ko, asinain ziaza rawk a si cang caah a ziaza a thup kho cawk lo i, duhsah tein an rem lo chin lengmang.

A hrem chin lengmang. An daw lo chin lengmang. Inn ah kir le a ngamh ti lo. Sal rian a tuan cang.A donghnak ahcun a celh ti lo i, ka nu sinah ngaihthiam ka hal lai i, ka kir than ko lai. Ka celh ti lo a ti. Phone cu aa lak i, a nu cu chawnh a vun timh. A therh thluahmah i, biafang chim ding zong a thei lo. A dang ah hlah maw a lei aa benh ti awk in a chim awk a thei lo. Phone cu a ring thluahmah.

A nu nih a rak tlaih i bia an i ruah.Nule nih fale a kan dawtnak cu a fak tuk ve i, therh lengmang tein ‘ka nu’ a vun ti cangka cun a nu cu a tap thluahmah i bia zong a chim kho ve lo. A mitthli tiluan in an luang thluahmah. An nufa in biachim kho loin an tap thluahmah. A fanu nih cun ‘ka nu, zaangfahnak tein na ka ngaithiam kho lai maw? Ka celh ti lo. Ka rak tin ko cang lai’ a vun ti.A nu cu a kuai dih cang. A celh ti lo. Biachim kho loin a tap thluahmah cang.

Duhsah in thazaang an vun laa than i, ‘ka fa, kan ngaihthiam ko. Kan ngai tuk cang. Rak tin zokzok cang. Namgmah loin kan um kho ti lo’ aw nem tein a vun ti. An rak i sik lio biachim le umtu kha a philh kho lo i, nu nih zeitluk in dah a dawt timi a theih cun lunglawmhnak in a khat than.A thaizing khuadei hmanh an hngak ko ti lo. It loin khua an deu. Banner nganpi an ser i, “Welcome Home, Sweetheart. We Love You So Much” an tial. Bus station ah an chungkhar le an hawile vialte he banner cu an i tlaih i an fanu cu an dong.

Bus cu a rak ra thluahmah i, a rak phan. Kuh le tahnak in caan an hmang.Ka nu, ka palh tuk. Ka ngaithiam. Ka sual hrimhrim ti lai lo. Na duh lo ning zong in ka um ti lai lo’ a ti i, lunglawmhnak ngaihthiam bu he lunglawm tein inn leiah an tin hna. Pa Pathian nih a kan dawtnak a langhtertu tuanbia hmanthlak dawh pakhat a si. Zeitik ah dah ka fanu le ka fapa le hna hi ka sinah an rak kir te lai tiah an kan hngah lengmang ko.