Un General Assembly Ah Donald Trump Le Iran President An Bia Cu Tih Nung Ko

NizanĀ  73rd UN General Assembly palai hna hmaika ah US President Donald Trump nih Iran cu fak taktak a phomh hna. Atimi cu Iran hi ziknawh eihmuarnak khua a khangin lai a relmi le mipi canvo oil man zong a billion in an tangka bawm ah an khumh tiah a ti. Culawng siloin a peh rihmi cu thinphan thlalaunak le lungretheihnak siseh chiatnak a chuahtertu cun ram innpa canvo a ttihzah lomi le Middle East ram ah a ummi ralhrang hna a cawisang tu etc.. tiah a ti pin ah vawlei pi nih Iran hi kaltak in hnu chit cang ding a si tibantukin biafak ngaingai a phomh hna.

Nizan Donald Trump chimmi kongah Iran President Hassan Rouhani a thin a khanh ngamsam. Tuchun ah biachimnak caan a hungphan i, Iran president nih a phomh ve mi cu US hi vawlei cung kalning le sining phunglam a hrawktu taktak a si.

Miram a hrocer in a tthihphaih lengmang mi a si i, tangka hmangin thazaang a chuahtu le tangka hmangin tukdohnak a tuahtu ralhrang, mah duhning hawih in vawleipi a nawlngeihnak tangah chiah a timi a si tiah Iran President Rouhani nih palai hna hmai ah Trump cu ceilak in a tthuat tthan ve. Hi an i phomhnak konghe pehtlaiin UN General Assembly lawngah siloin UN Security Council Meeting zong Iran hi US President Donald Trump nih a phomh tthan te lai tiah zumh a si.

Iran nuclear deal kum 2015 ah rak tuahmi cu US nih aliamcia May thla ah khan a chuah taak cang. Iran dantatnak le phihkharnak pehzulh dingin November ni 4 deadline tuah a si. Hi caantawite chungah Iran chawleh chawhrawlnak he aa pehtlaimi vialte hna cu US nih nan hrawh dih lai tiah nawl a rak chuah cang.

Asinain EU ram UK le Germany cun France le EU lutlai hna nih cun US nawlnak tuahmi hi zeite hmanh ah an rel lo i, a si khawh chungin ttanlak pi in lam kawlpi dingin biachahnak an tuah.