Kan Ngaihthiam Khawh Ko Nain Zeitik Hmanh Ah Ka Philh Ti Lai Lo

“Kan ngaihthiam khawh ko nain zeitik hmanh ah ka philh ti lai lo” tiah kan chim tawn. Asinain, philh khawh lomi midang palhnak cinkennak nih lawmhnak innka a hren tawn. Lungfahnak aa cinken zungzal mi cu kan nunnak ah hmunthur rit ngai in a phor lengmang mi kan si. Midang palhnak philh khawh lo cu; kan ca zongah a tha lo, midang ca zongah a tha lo lungthin thaba men a si ko. A lenglei thilrit phurh mi nakin lungthin nih a phurhmi thilrit nih kan nunnak harnak a pek tawn.

Jesuh nih thilrit chaan a kan timhmi hi na sei chungin thingtan hna kha a si lo. Na lungthin nih a phorhmi, nangmah ca zongah a tha lomi, midang ca zong a tha lomi mi congoihnak le ngaihthiam khawh lonak le lungfahnak vialte kha an si.

Midang cungah kan lungfahnak i khawn nakin midang nih kan cungah an tuahmi thatnak tu kha cinken khawh kha a tha deuh. Hmunthur a khawn tu si nakin sui a khawn tu si a tha deuh. Mi ngaihthiam le midang caah thatnak tuah nakin a sunglawi mi a um lo. “Kannih cu Pathian kutchuak kan si i Pathian nih thiltha tuah dingah a rak kan tinhmi kan si.” – Efesa 2:10

By : Victor Aung Thu Lin