Hrintthan Kan Ti Lengmang Mihi Zeidah A Si?

Na hrintthan taktak hnga maw? Na hrintthan lo kho men!

Hrintthan cu a tawi fian nakin chim ahcun “Ahmanmi pehtlaihnak in Pathian he ipehtlaih” kha hrintthan cu a si. Pathian he ahmanmi pehtlaihnak in kan i pehtlaih khawh nak caah cun sual ngeihchihnak, cohlannak, zumhnak, Thiang Thlarau tinconak hna hi a herh hrimhrim mi an si. Asinain sualnak cu kan i ngeihchih cio ko ti a si. Khrih cu kan cohlan cio ko ti a si. Khrih cu kan zumh cio ko ti a si. Thiang Thlarau zong cu kan tinco cio ko ti a si. Asinain a tanglei sining he na nun lo ahcun na hrintthan rih loh tinak asi hnga. Hell mei chung in na luat rih loh tinak a si.

Cucaah na hrintthan ahcun

  1. Hmantein Thlarau Rawl Na Ei Awk Asi (Bia. 2: 17)

Laimi cu “ka hrintthan ko” ai timi kan tam ngai nain Sunday chun lawng bak ai pum i pumh a duh ti lomi kan tam tuk. Nan hrintthan lo caah a si. Zan pumh pohpoh ahcun church members 300/400 hrawng an umnak Khrihfabu zongah minung 30 hrawng lawng an i pum. Kan hrintthan cang, khamhnak kan co cang, vancung khua cu kan ta a si cang, kan i pumh lo zongah a poi ti lo an ti. Rawl a ei ti lomi satil cu a ngan a dam lomi an si. Rawl ttam zong a hngal ti lomi satil cu an thihnak caan a nai tuk cangmi satil an si. Zumtu ka si, hrintthanmi ka si ai ti ttung i Pathian bia, van maana hmanh ei a vun duh ti lomi, thlarau rawlttam zong a hngal ti lomi cu Khrih ah nan rak nun lo caah a si. Taksa caah rawl khim tein ei kan duh bantukin Thlarau in hrintthan a simi hna cu Thlarau rawl kha khim tein ei an duh ve. Thlarau rawl cu biatak a si. Cu biatak cu na ttam lo, ei nai timh lo ahcun na rak hrintthan lo.

  1. Pathian He Ai Chawnbia Mi Na Si Awk Asi (1 John 1: 3)

Hrintthan cu Pathian he ahmanmi pehtlaihnak i ipehtlaih asi kan ti cang baktukin, na hrintthan ahcun Pathian nih bia an ruah lai i, nangmah zongnih Pathian kha bia na ruah ve tawn awk asi. Pathian nihcun zeitindah bia an ruah lai? Na caah ttial a simi Pathian bia, Baibal, kha rel duhnak a ngeimi na si lai. Pathian nih nihin kan chan ahcun Baibal in bia a kan chimh, Baibal in a kan cawnpiak. Cun, a herhmi le na duhnak kha Pathian na chimh ve lai. Pathian sin i kan herhmi chim cu thlacam a si. Baibal rel a duh lomi le thlacam a duh lomi kha hrintthanmi an si bal lo.

  1. Khrih Nawl A Ngaimi Na Si Awk Asi (Rom. 1: 5)

Hrintthan mi na si i Khrih he pumhkhat nan si cang ahcun Khrih duhnak tuah kha an duhnak ngan bik a si awk asi. Inchungkhar zong kan duhnak ai dan i kan duhmi cio poh kan tuah ahcun kan i rem kho lo. Cuvebantukcun Khrih duhnak tuah duhnak thinlung a ngei lomi cu Khrih he nan buai peng ko lai caah Khrih he pum khat an si kho hnga lo. Khrih huatmi tuah a duh pengmi minung cu hrintthanmi an si lo.

 

  1. Khrih Lungput A Ngeimi Na Si Awk Asi (Phi. 2: 5)

Khrih nih a ngeihmi lungput cu atawinak in chim ahcun dawtnak a si. Ka hrintthan na ti ttung i na nu le na pa hmanh na dawt khawh hna lo, na unau hmanh na dawt khawh hna lo ahcun na hrintthan hrmhrim rih lo ti a lang.

  1. Pathian A Ttihzah Mi Na Si Awk Asi (Psalms 34: 9, Bia. 11: 18)

Hrintthanmi hna cu Pathian a thei fiangmi an si. Khrih a thei fiangmi an si. Cucaah Pathian kha ttihzah awk tlakj asi kha an hngalh i Pathian kha an ttih zah. Vawlei Bawi, mi sual pawl, hmanh a ttihzah hna i Pathian a ttihzah lomi cu an hrin tthan lo, Pathian pennak an hmu kho lai lo, Hell ah an tla ko lai.

  1. Pathian Rian A Ttuanmi Na Si Awk Asi (Mat. 28: 19-20)

Hrintthanmi hna cu Khrih a cohlang mi an si. Khrih nawl ngai lo in Khrih cohlan khawh a si lo. Khrih nih a kan fialmi cu vawlei cung ram kip ah va kal ulaw, thawngttha va chim hna uh a ti. Hi Khrih nih a kan fialmi hi hrintthanmi nihcun an tuah dih awk asi. Pastor kan si dih awk asi ka ti duhnak a si lo. Asinain Hrintthan mi pohcu Pathian ram kauhnak caah an si khawh tawk in an i tel zungzal.

  1. Sehtan Ral A Do Mi Na Si Awk Asi (Eph. 6: 10-20)

Hrintthanmi ka si ai ti ttung i Sehtan lei a ttangmi kan tam ngai tawn. Sehtan cu Khrih ral a si. Zumtu hna ral zong a si ve. Kan nihcu Khrih i a ralkap kan si caah Khrih nih Sehtan ral doh kha a kan fial. Sehtan duhnak vialte kha kan doh lai. Sehtan program vialte kha kan doh lai. Sehtan domi na si lo ahcun na hrintthan hrinhrin rih lo tinak a si.Aung Myint Thang

Tuahsernak in khamnak kan hmuh siloin khamhnak a hmumi, hrintthanmi hna nunphung tu a si.

By : Rev. Aung Myint Thang