Kan Miphun Uarmi Le Duh Zawng Aa Thleng Cang” Ti Kan Hngalh Rih Lo Caah A Si

Lai tlang le Kawlram ummi kan miphun lak ah zeibantuk puai/zuamhnak hmanh, i sik le i velh ruang ah a dih hlan in ngol, ti hi hmuh awk a um huaha ti lo; kan hngalh dih lo zong a si kho men. (Khuate lei ahcun um zong um kho men). Cun ram thumnak ummi kan Lai miphun lak zong ah, i sik le i velh ruang ah a dih hlan in puai ngol hi kan thei bal ve lo.

Nain ram hnihnak (India/Malaysia) um Lai miphun ca ahcun buainak loin a dih tiang puai/zuamhnak tuah cu a har taktak; sik le velhnak nih a hrawh zungzal! Kaa palh sual lo ahcun tluang tein a dih tiang, siknak le velhnak ruang ah ngol hau loin, kan lim khawh zungzal mi cu Crusade le Camping lawnglawng a si, tiah ka ruah. Zeidah a ruang si hnga?

Zuu kan din ruang ah, peng tlang le khua tanh kan thiam lo ruang ah, sungh kan thiam lo ruang ah, tbk. pawl a ruang chim awk tampi a um ko lai sihmanhsehlaw ka siaherh bikmi pakhat te lawng ka hun langhter lai.

Hi bantuk in zuamhnak le puai tete chuak lak in kan tuah khawh tawn lonak a ruang bik cu ram hnihnak ummi Lai miphun nih hmun dang vialte ah kan miphun hawi nih an uarmi le duh zawng an thlen dih cang, ti kan hngalh lo caah a si ko. A hnu cem kan hngalhmi Lai tlang ahcun thitumnak, X’mas le miphun puai kip ah a buaimi si kha minta (actor) tuan khawh le dirhmun sang ah rak ruah a si. “An ka ngamh lo, ka tthuat hna, ka bengh, ka hro i a dai…” hei ti bantuk biafang pawl rak uar lio caan lawng kha ram hnihnak um Lai miphun mithlam ah a cuang khomi a si.

Cu bantuk cu uar le upat an si peng rih ko rua, tiah ram hnihnak um Lai mino nih kan i ruah sual; thilsining aa thleng diam cang, ti kha kan hngal ti lo! Puai caan ah a buaimi si le “ka tthuat hna, ka hro hna, an ka let ngam lo..” hei ti pawl kha Lai miphun nih kan uar rih ko rua, tiah kan i ruah caah hi ti hin kan um, tiah ka ruah.

Ram lakah kum saupi a tlaumi tafar hna ko kan lo ka ti. Ram lakah an rak um lio ah an uar bikmi le an i nuamh biknak cu saram thah, saram thisen din le biar-mei he meiphu kaam ah laam a rak si. A farnu cu ruah lopi in khuami nih an tlaih i inn ah an tlunpi; ningcang tein minung sin ah khua a sa cang. Kum zeimazet hnu ah, khuami nih a ta pa zong cu tuupi chung ah an va hmuh ve i a farnu umnak inn ahcun an tlunpi ve.

Voikhat cu a ta pa nih “vainaam aa lak i an inn tual ah a tlawngmi vok a thah, a thisen a lak hnu ah meiphu a tuat i a farnu te cu “ra hmanh, na uar tukmi thil kan tuah lai, ka sersiam dih cang..” tiah a va sawm. A farnu cu a rak chuak i a thil tuahmi a hmuh tikah a lau tuk..”ka ta…, hi bantuk hi cu kan uarmi si ti lo; saram bantuk in ram lakah kan um lio i kan rak uarmi pei a si ko cu. Atu cu minung sin ah pei kan um cang hi..minung bantuk in nung ve cang u sih..” tiah a ti i a tapa te cu a hmai a sen, a ning a zak tuk i “sorry, kan uarmi aaa thleng cang ti ka hngalh rih lo ruang ah si..” tiah a rak ti.

Fimnak le hngalhnak a rak tlawm lio le thanchonak zeihmanh a rak um rih lo lio caan ah rual-u hna nih an rak uar tawnmi “puai caan buai, zatlang laam cung aukhuan, ri-nga in vah, ka tthuat, ka bengh, a ka ngamh lo..” ti pawl kha thanchonak tizuu a teep cangmi Laitlang le ram thumnak um kan miphun hawi nih an uar ti lo. Minung taktak bantuk in nun le ningcang tein khuasak tu an uar cang, tihi hngal ve cang u sihlaw ramhnihnak ah zuamhnak le puai a dih hlan in ngol cu a zawr ruangmang ko hnga. Kan miphun hawi nih an uar rih rua, tiah maw ruat sual lai u cih..

By : Pastor. Hram Bik Lian