Harsatnak Kan Tonmi Hi Pathian Sunparnak Ding A Rak Si

Harsatnak Kan Tonmi Hi Pathian Sunparnak Langhnak Ding A Rak Si.Baibal cang:Jesuh nihcun ”A mitcawtnak hi amah sualnak ruangah siseh, a nu le a pa sualnak ruangah siseh a si lo. Pathian ṭhawnnak cu amah damnak thawng hin a langh nakhnga caah a mit a cawt hi a si …” tiah a leh hna.(Johan 9:3)

Zumtu tampi nih harsatnak, temtuarnak le retheihnak phunphun kan ton tikah mi vanchia ah kan i ruat tawn. Asilole kan sualpalh ruang le Pathian dantatnak ah kan ruah tawn hna. Vawlei a si bantukin a chan ahcun vanchiatnak kan tonmi hna le kan sualpalhnak ruangah kan inmi dantatnak hna cu a um ve ko.

Nain, zumtu hna nih temtuarnak le harsatnak phunkip kan tonmi hna hi suallam tampi a rak ngei tawn i Pathian nih thluachuahnak pek le a sunparnak theihter a kan duh caah a rak si tawn.A chuahka in a mitcawmi pa an hmuh tikah zultu hna nih Jesuh cu an hal i, zeiruangah dah hi pa mit hi a cawt. Amah sualnak ruang maw, a nu le pa sualnak ruang dah a si an ti? Jesuh nih cun, “A mitcawtnak hi amah sualnak ruangah siseh, a nu le a pa sualnak ruangah siseh a si lo.

Pathian ṭhawnnak cu amah damnak thawng hin a langh nakhnga caah a mit a cawt hi a si (Johan 9:3) tiah a ti hna. Cutikah Jesuh nih vawlei ahkhan cil a chak i tlak tlawmpal a ser i mipa mit ah khan a nalh. Cun Siloam Tidil ah na hmai vaa phiah tiah a a ti. Cuticun mipa cu a va kal i a hmai cu a va phiah i, khua hmu buin a rak kir.

Cuticun Pathian sunparnak le Jesuh cu damnak Bawi a sinak cu mitcaw pa sinah cun a lang.Amen.Cu bantukin Job nunnak kan zoh tikah Baibal nihcun ‘ soisel awk um lo, miding, Pathian a ṭihzah i ṭhat lonak kha a hrialmi pa a si (Job 1:1) tiah a ti. A fale hrimhrim zong nih sualnak an tuah sualnak hgna lo dingah zingka in a tho i Pathian sinah raithawinak a tuahpiak lengmang hna. Asinain ruah lo piin cikhat te ah fanu fapa hna le a sal hna le a satil vialte hna cu an thi dih. Amah hrimhrim zong fihnung tukmi hma nih a ke in a lung tiang a tlunh hnawh dih.

Sihmanhselaw Job nih Pathian cu hlaw loin fek chinchin in a tlaih tikah Pathian nih Job cu a hlannak in thluachuahnak tam deuhin a pek i fanu le fapa hna zong a pek ṭhan hna. Vawlei cung ah Job fanu tlukin a dawhmi an um lo tiah Baibal nih a ti.Cu bantukin zumtu hna zong Pathian sinah kan i pe ngai kan ti i thla zong kan cam ngai i, thawhlawm zong kan pe ngai.

A phunphun in Khrihfa bu le Pathian ram caah tiah kan i zuam. Sihmanhselaw kan sianginn kainak siseh, kan rianṭuannak ah siseh, kan chungkhar ah siseh a phunphun in sungh zatlaknak maw, damlonak maw, harsatnak maw tibnatukin a phunphun in kan cungah a rak tlung tawn.

Cu vialte hna cu zeidang ruangah si loin Pathian sunparnak kan hmuhnak ding le Pathian dawtnak kan theih khawh chinchinnak ding le thuachuahnak kan hmuh chinchinnak dingah a rak si tawn. Cucu mi tampi nih kan theih thiam lo tikah kan vuifai i, Bawipa nih a kan daw lo tiah kan ruah i Patian tu hnu ah kan chit tawn. Cucu a si lo, kan tonmi harsatnak vialte hna hi Pathian sunparnak a langhnak dingah an rak si. Bawipa nih thluachuahnak pe ko seh. Amen.

Note:Mah sermon hi attialtu ka vun philhsual caah a ruahzia rak ka thiam hram uh.