Laimi le Pastor

Hlan deuh ahcun Laimi kan pale biachimmi hi mizapi nih kan theih kan ngai kho tuk lo caah Pathian riantuantu hna hi zeitindah an hmuh hna ti hi a lang kho lo. Tlawmpal hnuah cun Laimi nih chuahmi Mekazin tete ah kan pale nih Pastorte an hmuh ning a lang pah cang, i atu ahcun kan pale lawng hlah, Laimi vialte nih pastor kan hmuhning cu nilin lak fang pho in aa pho cang.

Khrihfabu ah siseh, thutpumh biasawngtlorhnak ah siseh, mekazin le midia kip ah siseh pastorte kong tha chim a um ti lo. “Samurai an ti chel, sapherh kuat ngam an si lo an ti chel, holh le ca hlan in pek than an hngal lo an ti chel, pastor pawl thah ding ti hna sehlaw hmasa bik ah kaa thawh lai a ti na, a phunphun in mu?

Voikhat cu mekazin pakhat ah hitihin an tial “Laimi, i funtomnak lei kaar hlaannak ding ahcun, Khrihfabu biak loin Khrih kan biak a hau, Pastorte zong nih tuu kha zua loin an khalh a hau.” Pastor pakhat hmanh an i tel lonak political party zong hi ziah mah tluk hin an i then? Kan pale mifim fim nih dirhmi party lawngte pei an si tiah. Bu thennak zongah pastor puh, holh le ca kong chim zong ah pastor puh, tangka kong zongah pastor puh. Laimi mifim le catial thiammi hna nih pastorte hi phunkip in an puh hna caah kan zatlang nun ah Pathian riantuantu mithmai a bi taktak.

Cu chinchap ah, pastor nih pingpang an ton sual chinchin ahcun humzual aa timmi ahohmanh an um lo, an biaceih a fak ning tu cu khuaruahhar in; midia kipah sazaam phawt khawh chungin an phawt hna, rel ngam le chim chin ngam ding hmanh an si lo. Kan hnulei i pakhat hnih kan ton ciami i kan holh le kan bia reru kha mu? Pastor kong chim ah bia fakfak hman lo cun cheukhat cu an lungdi a riam kho lo.

Facebook i comment tete zongah hin pastor a si tiah hmaizahnak pakhat hmanh a um ti lo. Ziah, Pathian a tih lomi le khuaruat kho lomi nih dirhkamh awk an hngal lo hmanhah Laimi kan pale tal nih an dirhkam bal hna hnga lo mu?

Keimah bantuk, zeilei paoh in fial chuk fial cho hmanhah a tha lomi ruangah pastor thatha tampi an limhang a zor, an mithmai a bi, an ka a pit. Cheukhat cu pastor kan si hmanh ruat manh loin duh tlawng pawl kan tam ve hoi; bia chim ah, catial ah, nunzia ah, .A hmaan ko, hi vialte riantuantu lakah cun san a tlai lomi zong kan um ve taktak ko lai.

Laimi zatlang nun ah pastor hang a kha ngai cang. Hlan ahcun mifim le cathiam nih bible sianginn an kai, vawlei lei sianginn nakin bible sianginn in bochan tlak mifim tam deuh an chuak. Cu hna cu Laimi caah arfi bantuk in an ceu i anmah ceunak tangah a rak idormi Laimi kan rak si.

Cozah riantuan tampi nih an rian chuah takin Pathian rian ah an lut. Asinain atu cu tanghra awng paoh ahohmanh bible sianginn kai an sianh ti hna lo, kai lung chuakmi zong an um fawn lo. Pastor cu nautami rian ah aa cang, nihin Laimi chunmang ah pastor tuannak chunmang a um ti lo. Khrihfabu tampi ah Master tal lo cun ti a si hoi. Tanghra awng nih bible sianginn an kai duh ti lo i tanghra hmanh awng hleng loin Master le Doctor ka si va ti ve cu mi zeirel lonak chin. Kan phungphai, kan lungput le kan dirhmun hi?

Thaizing zeidah kan lawh te hnga mu?

Credit: Biak Mawng