Hakha Mipi Pakhat Le Pakhat Kan Ni Seh Dih Cang

Halkha Nu/pa Hna Nih Halkha Khuapi Caah Pupa Vawlei Hi An Pek Siang Aherh.An Pek Siang Tuk Fawn Ko Lai Ka Zumh

Jan 4,1948 ah Mirang kut in luatnak kan hmuh tikah cikhat ca ko ahcun i lomhtuk cio a rak si.Cucaah Feb 19 in 22 tiang 1948 kum ahcun Falam khua ah Conference tuah a rak si i cu Conference ahcun agenda pa (4) an rak ceih.Culak ah aa tel mi cu Feb (20 ) ni ah rak ceih mi Ramukbawi uknak hloh ding kong kha a rak si.Laimi zong nih Democracy hi mah lio chan te khan kan rak pemh i kan duh tuk ve cang.

Cucaah Nihinni ah Ramukbawi uknak tha lo tiah kan soi mi Pi/pu hna hmanh nihkhin mah lio chan khan ruahnak kau le lungput tha Chinram caahcun an rak ngei.An chan nih a rak kalpi mi chan tiluan a si caah a rak si deuh.An nih cu nunnak pek ngamh in Miphun le ram dawtnak lungthin tak an rak ngei.Nihin hruaitu kip tu hi chanthar ah kan um nain khahlan pi/pu hna nakin bia cu kan chim kho nain Ram kan dawtning bal te cu a sit deuh hrim men lai.

Pakhat le pakhat kan i seh dih ve ko hna hi mu. An nih cu an ram le vawlei vialte mipi biachahnak bantuk in a cozah sinah an up i ,an sinah a um mi Sal vialte zong zalong tein an luatter dih hna.Meeting kai mi (5000) lak ah mee(17) long a duh lo mi mee an rak si.Mah lio chan hmanh ahkhan an nunnak ah thenawk tha lo bantuk asi mi an vawlei le an sal hna hmanh kan Chinram te thanchonak le thatnak caahcun tiah al lo le buai tuk lo tein an rak up dih ko.

Thil har ngai ding hmanh khi ningcang tein tuan ahcun Ramuk Bawi hna zong nih zaangdam tein an sinak vialte an rak pek dih ko.Nihin Halkha Nu/pa cheukhat nih ngeih mi vawlei hi mah he hin tahchunhawk le chimawk thlak ah ka ruat lo.

Cozah nih ningcang tein rian an tuan thiam ko ahcun Halkha khuapi Nulepa cu Lailei Khrihfabu fate bantuk menmen an si lem lai lo i khuaruat kho an um hrim ko lai.Kan Chin Cozah nih rian hma an lak ning hi Mipi caah atu bantuk in a fah deuh ko ahcun remh a herh mi cu remh le tuankhawh i zuam ve ko hna seh.Innhmun samh cu kan ram thanchonak ding caah asi.2020 pinlei chinchin cun Innhmun biatak tein samh a hau te ko lai.

Cucaah kan Pupa ram tiphun in kan ti i hramhram in kan i tlaih peng ve te sual ahcun zeitin dah kan khuapi cu International level in Capital ah kan ser kawh ve hnga.Pupa ram hi tawngtaw tleih in kan i tleih ve ahcun kan Capital hi kan thial bak a hau ve te hnga.Nain Halkha Khuapi caah Halkha Nu/pa hna nih khua an ruat hrim ko lai.A biapi mi cu Rian hi ningcang tein hram domh i tuan a herh hringhran peng ko.Rian ningcang te tuan kan ti mi cu dinfel khi asi.Dinfelnak nih miphun a damter .Dinfelnak nih Miphun a thanchoter.

By : Al Bik Lian Zathang