Australia Ram Kong Chinmi tampi umnak hmunhma theih/herh ttha ngai!

Australia ram cu vawleicung continent (vawleipi tthen) 7 lakah a hme bik a si nain, amah ram nih a ngeih caah continent (vawleipi tthen) pakhat a si ve. Vawleicung ram ngan bik ah 6nk a si. Hi ram cu Aboriginal miphun, minak pawl nih kan hnulei kum 45,000 lio ah khan Indonesia ram lei in vok kuanglawng in an rak panh, khua an rak saknak a si. 1770 kum lio ah England ram in ti ralkap Capt. James Cook nih an rak hmuh i, 1780 kum ah Capt. Arthur Phillip hruaimi ti lei ralkap sangphawlawng 11 nih thongtla pawl tampi an rak phurh hna i, Sydney khua pawng Botany Bay i hmunhma an rak lak hnu in, England ram kuttang ah an rak chiah.

Mah hnu cun England ram i thong a tlami pawl kha an rak kuat lengmang hna i thongtla minung 160,000 tiang an rak chiah hna. Cu lio ah cun mah le State cio in an rak i uk nain, 1901 kum ah Federal system hmang in Australia ram cu an rak kawmh i, “Commonwealth of Australia” timi min an rak pek. Melbourne khua kha national capital city ah 1927 kum tiang an rak hman. Atu ah cun vawleicung ah ram tthangcho bik ram pakhat le, khuasak tlawnlennak lei a nuambik ram ah an sersiam khawh cang. Ralzam mi tampi zong kumfatin an lak lengmang hna i, an cawm hna leng ah, mahle mah paw i cawm kho dingin lam an hruai hna. Cu hna pawl kha a lamkip in an tthanchonak ca ah an bawmh hna.

Australia ram a bit-kauh cu nuai 7.76 sq. km asiloah nuai 2.9 sq. miles a si i, Kawlram nakin let 12 renglo a kau. National Capital City cu Canberra a si. State 6 le Territory 2 in kawmhmi ram a si. State hna cu: New South Wales (khualipi – Sydney), Queensland (khualipi – Brisbane), Victoria (khualipi – Melbourne), South Australia (khualipi – Adelaide), Western Australia (khualipi – Perth), Tasmania (khualipi – Hobert) hna an si i, Territory hna cu: Northern Territory (khualipi – Darwin) le, Australian Capital Territoty (khualipi – Canberra) hna an si.

Australia ram milu cu 23 million an si i, biaknak lei ah Khrihfa hi 63% an si. An ram hmelchunhnak (National Symbol) cu Kangaroo saram le Emu va hna an si. National Flower cu Golden Wattle a si i, aihre muici a ngei. Australia miphun hla (National Anthem) cu “Advance Australia Fair” a si. An ram an i uk ning cu Parliamentary Democracy a si i, Federal System timi mah le ramkulh chungah mah nih khuakhan lairel khawhnak nawl an ngei. Australia ram i zoh phu le va tlawnlen awk ah minthang hna cu: Sydney Harbour Bridge, Opera House, Urulu lungsenpi, Bondi Beach, Melbourne Cricket Ground, Ballarat suikhor le Eureka Tower te hna an si.

Australia ram cu vawleicung ram `hangcho bik le ram `ha bik ram 10 lak ah aa tel. Democracy Index 2014 ning in full democracy (91% democracy) in an i uk. Human Development Index 2014 ning in an tthanchonak khi vawleicung ah pahnihnak a si. Fim cawnnak lei ah, vawleicung ah World Class University 400 a um i, Australia ram ah university 39 a ummi lak ah, World Class University ah aa tel mi cu, university 20 hrawnghrang an si. Australia ram ah khua a sa mi miphun 240 hrawnghrang an si i, holh phun zong mahzat hrawng cu a um ve.

Cu caah, 1935 kum thawk in VSL timi Victorian School of Languages sianginn an hun dirh i, atu ah cun Victoria State ah holh phun 48 kha anmahte in an i cawnpiak khawh cang. Chin-Hakha holh zong 2010 kum thawk in tang 1 in tang 10 tiang cawnnak nawl an hmuh ve i, 2015 kum ah VCE an hmuh caah, atu hi tang 11 an cawng kho cang. 2016 ah tang 12 zong an peh khawh cang. Cu Chin-Hakha holh a cawngmi cu Melbourne nichuah le nitlak ti in centre 2 a um i, an zate in siangakchia 300 hrawng an si. Cu VSL ah cun siangakchia 16,000 renglo nih anmah le an holh te kha an cawng i, sayate 800 hrawnghrang nih an chimh hna.

Hawi dang ram nakin Australia ram a tthat khunnak cu: Multiculturalism timi miphun tampi nih mah le nunphung te in le zalongte in nuncan khawh le, cu nunphung hna cu kilven khawhnak a ummi hi a si. Hi ruang ah hin miphun pakhat le pakhat i namnehnak, i khuhchihnak, i remlonak, i nautatnak a um lo i, miphun pakhat le pakhat i upat bu le i ttihzah bu in khua an sak khawh caah, ram a dai i nuamhnak a tam. Hi dirhmun zong hi hmakhat te ah an rak ser kho ve lo.

A hlan ah cun Australia ram ah Mirang (vun rang) mi lawnglawng pemnak nawl an rak pek hna. 1970 kum hnu ceo in vun rang a si lomi miphun dang hna zong pemnak nawl an rak onh hna. Cun, san a tlai deuh lomi Aborigines miphun hna zong kha 1965 kum ceo in luatnak an rak pek hna i an ram le an hmunhma hna zong humhak khawhnak nawl an rak onh hna. Cuticun duhsahte in a hun i sersiam lengmang i, atu ah cun Australia ram cu ram dai bik le ram nuam bik pakhat ah a hun i chuah cang.

Australia ram in thil mansung a chuakmi cu: lungmeihol (coal), thir hak a phunphun (iron ore), bauxite, gas le a dang leitang chuak hna an si. LungkhUr cawh le cinthlaknak le lothlawhnak lei zong ttha tuk in an tuah khawh leng ah, sa (thahcia sa zuar) lei zong in rian tampi le rian nganpi an ttuanchih rih. Fim cawnnak lei zong in ramdang mi tampi an rak cawng. Ramdang he chawleh chawhrolnak zong kaupi in an tuah i Japan le Tuluk (China) hi, cu lei kap ah cun pehtlaihnak a ngan bikmi ram an si.

Hi tluk i aa dawhmi, a tthami le a tthangchomi ram ah keimah hoi hna khua ka sak khawh, ka um khawh le ka va tlawnlen khawh hna hi vanttha ngaingai ka si tiah ka ruah. Fim cawnnak le rian cawnnak lei hrimhrim a tthat tuk caah, ka si khawh chung in kaa zuam lai i, hmailei ah zohchunh awk tlak pasalttha/nusalttha ah si ding khi ka duh tuk. Hi bantuk caan ttha le caan rem hi ka semnak ram ah zeitik hmanh ah hmuh khawh lo ding a si. Asinain, Pathian nih remruat in khua a ka khanpiak caah kaa lawm. Hmailei ka lamthluan cu nika a chuakka bantuk a si ko. Keimah le keimah tu bia i khiak in a dikmi lamthluan zulh ding tu kha kaa zuam lai. Hi ca hi VSL Laica tang 10 siangakchia pawl Catian (Essay) ttial thiamnak ca ah, zohchunh awk (sample) pakhat in ttialmi a si.

F.Lai Len