“Bible Cu Pathian Thawchuah Hnawhmi A Si” Kan Ti Tik Ah Kan Hngalh Chih A Herhmi Tete

1. “Bible cu Pathian thawchuah hnawhmi a si” timi nih fiantermi le fehtermi pahnih a ngei. A pakhatnak ah, Bible cu (Genesis – Biathlam) tiang a chimduhnak sullam le tinhmi ah palhnak le hmanlonak pakhat hmanh a ngei lo, tinak a si. A pahnihnak ah, Bible cu (Genesis -Biathlam) tiang a biafang le a deh tiang zong in palhnak le hmanlonak zeihmanh a ngei lo, tinak a si.

Zeiruang ah dah Bible cu a chim duhmi sullam le tinhmi ah siseh (content/meaning), a chimmi biafang le deh tete tiang in siseh (word/spelling) palhnak le hmanlonak a ngeih lo ti ahcun, a palh kho lo mi Pathian Thiang Thlarau hruainak tang ah tialmi a si caah a si; a tialtu (author) taktak cu Pathian a si ca ah a si ko.

2. Asi kun ahcun, Laimi nih kan ngeihmi Bible pathum: Lai Baibal Thiang (David Van Bik) Hakha Baibal Thiang (Hoi Cung Tum) le Baibal Cathiang (Rual Uk) hna ah Spelling palhmi an um maw? tiah biahalnak hun tuah hmanh u sih.

Spelling le biafang palhmi tampi an um ruang ah tu hlan ah voitampi remh an si cang, tu hnu zong ah remh cuahmah peng an si ko lai. A spelling le biafang aa palh ahcun a sullam zong a palhnak zawn a um lai, ti cu a fiangmi a si ko. Kan Lai Bible lawng si lo, leh chommi Mirang Bible version vialte nih Spelling palhnak tete cu an ngeih cio ko!

3. Asi ahcun, cu bantuk Spelling le sullam palhnak a ngeimi leh chommi Bible version pawl cu Pathian thawchuah hnawhmi an si kun lo maw? Ziah dah, an palh khawh kun?

Copy chommi le leh chommi Bible version poh cu “a sullam in siseh, a Spelling ah siseh, palhnak le hmanlonak zeihmanh a ngei bak lomi le Thiang Thlarau hruainak tang ah Pathian minung (human writer) Paul te hna nih an kut in an rak tialmi original cauk in a palh khomi mifim le cathiam hna nih an fimnak le thiamnak hmang in an kan copy piakmi le leh piakmi” an si dih.

Sullam le Spelling palhnak fang khat zong a ngei bak lomi kha cu original Bible cauk (Paul te hna nih an kut bak in an tialmi kha) lawng kha a si ko.

Nain atu kan hmanmi Lai Bible bantuk pawl zong hi Pathian thawchuahmi cauk in copy chinni le leh chinmi an si ve caah cauk dangpi cu a si lo; kan palh sual lai ti phang taktak bu in copy an rak tuahmi chung in leh chinmi an si caah bochan an tlak ko. Nain copy bal hlan, Pathian nih minung sin ah a pekmi a original cauk bantuk in Spelling zong a palh kho bak lomi an si lo, ti bia tu khi a si.

Sullam zong ah siseh, Spelling zong ah siseh, palhnak le hmanlonak pakhat hmanh a ngei bak lomi cu Paul te hna nih Thiang Thlarau hruainak tang ah an kut bak in an rak tialmi lawng ah khan a si!

Cucaah ahcun Bible versions tampi zoh chih le an chim cioning cuaithlai chun i a context ah zei biafang dah hman deuh dawh a si, tiah original sullam te kawl piak lengmang hi Bible hrilhfiahnak ah a biapi tukmi a si.

Note: zeitluk felfai in dah original cauk in copy an rak tuah timi ka tial than te lai).

By : Pastor. Hram Bik Lian