Tuchun Khrihfa Lainu Kan Thil Hruk Aih Hi A Hman Maw?

Hruk-Aih le Lainu

Phakanh lungcawhnak a rak pawtka ah Lainu cheukhat cu an rak pok ve, ti si. A taw aa zuar zong cu an rak um ko rua. Laipa lungfim deuh nih an thlauh hna. “Kanmah le kan thilri te zeidah nan iceih?” an rak ti lehlam hna i Laipa an holh ngam ti lo.

Kum 10 hrawng a van rauh ah, Hakha zong ah Lai taw zuar cu an hung um ve, ti si. Cu pawl cu, pastor te nih an va cawnpiak sual hna rua. “Kanmah le kan thilri kong ah zeidah nanmah pastor hna nihcun nan iceih, nanmah le nan rian te kha va ṭuan ve ko uh,” an rak ti hna. Pastor zong nih thlauh ngam an si ti lo.

A si. Anmah le an nawl te bak si ko. An taw an izuar zong ah, an vei an ilangh zongah, an lei an ichak zongah, zeidah naa ceih? Anmah nawlte khi a si.

Phei zim tak tiang rumro i ihruk-aih. Hnuk baa lang tiang rumro i ihruk-aih. Cu zong cu anmah nawlte ṭhiamṭhiam a si.

Miphun pi a si cangmi hna, an miphun milu a tam cangmi hna caah cun, tawzuar phu an um zongah, tawlang, hnuklang phu an va um zongah an caah zeipi si lo. An miphun chungah a phunphun an tlinnak tu si deuh lehlam.

Phun tlau aa tiim cuahmahmi, milu pelparik, miphun sinak le caholh tiang miphunpi nih zei tikah dah an kan dolh dih te lai tiah a phang cuahmahmi, amah bing tein dir khawh ve dingah aa sualsam leen rihmi miphun hna ca belte cun nu hna hruk-aih le ziaza nundan zong a rak biapi hringhran.

Nu pawl hi miphun kilvengtu an si ve, an ti. Acheu nih an biapi tuk tiah an cawisan hna.

Biakinn chungah a herhlo tuk tiang i hnuk lang kho dingin ihruk-aih, pheizim langhter hranhram tehna khi zoh dawh cu si ruam lo. Mizoram le Korea ram tehna ahcun, pa nih biakinn ah Jean tawhrolh ihruk, nu nih hot-saih tuk ihruk tehna hmanh an duh lo.

Lai democracy uar tuktu cheukhat nih hot thluahmah hna seh, zoh an dawh nan ti lai. Mah lio ahkhan nan pawngkam Kawlpa lullel pawl nih tleu pelpul in kutchu an rak in tuh hna lai.

“Bisakut lawh in lawh ding miphun an in ti hna lai.”

Lainu na si ahcun, ihruk-aih zongah a zia a um nan itheih a hau.

Note : Hmanthlak hi cu tah chunnak i lak mi a si, a mah nu hi a si tinak a si lo. Laknak Ramleng Chin.
By Salai Lai Kokek.